Invocatio :
Geluhndu arus erpalasken keleng ate, bagi Kristus enggo engkelengi kita, dingen ngendesken kesahNa man gunanta. Ia enggo mpersembahken diriNa jadi persembahen si merim si ngena ate Dibata (Efesus 5:2)
O g e n : Mazmur 22:2-12 (Antiponal); Khotbah: Lukas 23:44-48
Tema :
KUENDESKEN TENDIKU
Renungen…
Kenca Yesus enggo itangkap she mate I kayu persilang, la nai mbue kata pengajaren si ibelaskenNa. Amin gia bage kai siterjadi menjelang kematenNa e situhuna mbue pesan. Sebelumna enggo mbue pengajaren isehken Yesus, genduari eme paksana ija Yesus ncidahken siniajarkenNa e arah perbahanen. Emaka ibas kita mperingeti kematen Tuhan Yesus sendah, ateta menghayati mulihi pengorbanen Yesus I Kayu persilang bagi si ni sehken Yohanes 1:29 “Nehenlah enda me anak biri-biri Dibata, si ngangkut dosa doni enda!”
Menurut kesaksin Injil Lukas, khususna nats khotbahta, Lukas 23:44-48, ije ituriken kerna kejadin-kejadin si luar biasa terjadi ope ras kenca kematen Yesus. Kejadin e situhuna mereken mbue erti man banta guna tole semakin menghayati kinitekenna nandangi Yesus Kristus.
- Ikataken kira-kira pukul 12.00 matawari la nai ersinalsal gelap kerina negeri e she pukul 15.00. Lit sekitar 3 jam. Kejadin enda tentu sada hal si luar biasa ras labo kejadian alam bagi gerhana matawari, anem gia tempa bali. Endame sada keajaiben si icidahken Dibata man doni enda ija tempa doni enda mulihi bagi ibas Kejadin 1:2 eme “Lawit si mbelang ergalumbang itutupi gelap mesangat” (gelap gulita menutupi samudra raya). Kai ertina enda? Yesus eme terang situhu-tuhu, janah terang e nandangi mate si icidahken arah matawari lanai ersinar ope kematen Yesus, enda sue bagi si pernah pe ikatake Yesus ibas Yohanes 12:35 “Kentisik nari ngenca terang e ringan i tengah-tengahndu. Teruskenlah perdalanenndu asum terang e lit denga i tengah-tengahndu, gelah ola kam ikuasai si gelap; sabap kalak si erdalan i bas gelap, la ietehna ku ja ia lawes”. Amin gia bage, Yesus pe pernah ka ngataken ibas Yohanes 12:24 nina “Si tuhuna sengkebuah page labo reh buena adi la kin isuanken dingen mate. Adi benih e isuanken dingen mate, melala me buahna”. Enda mereken erti maka Yesus terang situhu-tuhu e la banci lang mate, tapi kenca telu wari, keke Ia ibas kematen nari jadi terang si tuhu-tuhu guna menuntun ntah mabai kalak ku bas kebenaren. Kerna angka 3 enda selket pe kaitenna kegelapen hanya 3 jam, kenca si e terang ka mulihi. Ertina payo Yesus, terang situhu-tuhu e mate, janah kematenNa berarti terjadi kegelapen, tapi hanya 3 wari kenca si e nggeluh ka Ia mulihken arah keke ibas simate nari eme Paskah. Enda pe mpersingeti kita maka tampa Yesus kegeluhenta enggo gelap, tapi sebaliknya adi ras Yesus kegeluhenta jadi terang. Payo kerina nge jelma lit masalahna, tapi adi ras Yesus tetap kita tenang, tetap erlayas ukurta tetap lit jalan keluar sabab bagi erdalin ibas gelap janah lit ibas kita terang simenuntun perdalinenta she ku tujun.
- Kire-kire rumah pertoton merigat erbelah dua. Perlu si eteh maka Kire-kire ntah tabir rumah pertoton eme penutup ruangen si maha kudus (ruangen si badiana) sabab ruangen eme ingan Dibata hadir. Emaka la banci ise pe bengket ku bas selain Imam si mbelin, e pe hanya setahun sekali (Heber10). Kire-kire enda mereken pengertin maka lit jarak manusia si erdosa ras Dibata (Bd. Yesaya 59:2). Tapi kenca kematen Yesus, kire-kire e merigat erbelah dua. Kai ertina enda? Enda ngataken maka dalin bengket ku ingan si badiana e (Ruang Maha Kudus) genduari enggo terbuka man kerina manusia. Sabab dosa lanai jadi penghalang memisahken kita ras Dibata erkiteken keleng ate Dibata si mbelin e enggo ngendesken anakNa sitonggal jadi korban pendamaian arah kematenNa I kayu persilang. Emaka meriah dingen malem ateta, kita si enggo ngaloken pendamen e ibas kita tek man Yesus Kristus si enggo mate I kayu persilang.
- Kesaksin kepala perajurit ras kalak si nterem si ngidah kejadin e. Kepala perajurit e pastilah jelas tehna uga proses kiniseran she ku kematen Yesus. Bagepe sikap, kata-kata ras kejadin ope ras kenca kematen Tuhan Yesus, she maka kepala perajurit e encidahken isi pusuhna alu melasken “Tuhu-tuhu la la ersalah”. Bagepe jelma si nterem si ngidah e mulih alu nentemi bana ncidahken perasan menyesal ntah erkadiola. Adi ndube situju Yesus e ihukum mate tapi ngidah kerina siterjadi e, muncul perasan erkadiola maka tuhu-tuhu Yesus e la ersalah. Payo Yesus e la ersalah, tapi guna nebusi dosanta manusia Ia mate I salibken gelah manusia terkelin. Adi bage kai nge pengataken bujurta? Cukup nge menyesal ras nentemi bana? Tentu lang. Tapi kita arus nerusken kesaksin geluhta si enggo erdame ras Dibata eme alu lit hubungen si mehuli ras Dibata teridah ibas kerina dampar geluhta si berubah ras erbuah.
- Jenari tema ibas Minggu enda eme “Kuendesken Tendingku”. Tema enda eme kata sipepudina ibelasken Yesus ope Ia mate I kayu salib alu ngataken “o Bapa ku bas tanNdu ku endesken tendingKu”. Kai ertina enda? Tentu arah tema enda jadi persinget ntah pe jadi pergegeh man banta kerina eme: Penebusen manusia enggo terjadi ibas kematen Tuhan Yesus I kayu persilang. Ija arusna manusia me si ngenanai kerina kiniseran she ku bas kematen e erkiteken dosa si enggo ngelangketi keri manusia, tapi erkiteken perkuah ate Dibata, Yesus Kristus gancihken kita ntah pe jadi kahulta. Emaka nintalah: bujur Tuhan, enggo Kam mate gelah kami pulah ibas kiniseran ras kematen si rasa lalap nari. Jenari sipeturahlah tekadta gelah ngergaken pengorbanen Yesus e arah ncidahken geluhta si ngasup pe ngalemi salah kalak, si tutus ersembah mpermuliaken gelarNa, nggeluh bujur ras adil, ras tentuna pe si ergiah-giah naksiken penebusen si ilakoken Yesus e man kerina jelma. Amin
Pdt. Sabar S. Brahmana
