PJJ 20-26 Februari 2022
Pdt. MEA br. Purba
Tema : Idilo Jadi Terang
Nats : 2 Korinti 4:1-6
- Kata Pengantar
Kemajun zaman la jadi sada jaminen kerna kemajun kiniteken. Tuhu melala kel perbahanen si la mehuli si mahanca ceda kinitekenta. Bagepe pengajaren-pengajaren si papak, si mabai kegeluhenta ku kebenen. Si e teridah arah buena perbahanen si jahat i tengah-tengah kegeluhenta.ibas berita, lalap ngenda lit si idah berita kerna tindaken kriminal si ncelakeken kegeluhenta. Arah tema PJJ ta sekali enda, idilo kita guna jadi terang i tengah doni si dem alu kegelapen.
- Isi
Korinti eme kota i Junani, i ujung barat Isthmus. Kota Korinti ringan i bas daraten sempit alu pelabuhen arah Timur bagepe Barat. Korinti eme kota si dem alu kegeluhen doni dingen ipengaruhi erbage-bage kebudayan. Kalak Korinti si ndekah nembah Dewi cinta, Afrodite, eme dewa si empengaruhi kegeluhen moral kalak Korinti. Kota Korinti eme kota si bebas dingen lit ibas kecedan moral. Arah surat Korinti enda Paulus nuriken erbage-bage perbeben si empengaruhi kegeluhen perpulungen i Korinti.
2 Korinti 4:1-6 enda nuriken kerna uga Paulus enggo idilo Dibata guna jadi terang. Igejapkenna maka pendahin si idalankena ras teman sepelayanenna eme erpalasken perkuah ate Dibata (ay.1). E me simahanca ia ras teman sepelayanenna la erleja-leja guna ndahiken dahin pelayanen. Amin pe situasi kota Korinti sangat menantang, la e mahanca urak semangat pelayanenna sebab enggo igejapkenna maka ia idilo guna jadi terang.
Bukti Paulus ras teman sepelayanenna enggo idilo jadi terang teridah arah perubahen cara geluhna. “Enggo itulak kami…” (ay.2). arah ungkapen enda teridah uga usahana guna ngelawan engajuk doni ku si la mehuli. Janah ibas geluhna tuhu-tuhu ngasup ia jadi saksi Kristus si nggeluh. “Labo ipitar balikkenna kata Dibata”. Sebab paksa si e lit pengajaren si papak si beredar i tengah-tengah perpulungen i Korinti. Kehadiren Paulus justru nerangi pengajaren si papak e alu terang pengajaren Kristus.
Paulus alu tangkas empetandaken Terang si enggo nerangi kegeluhenna (ay. 3-6). Terang eme Berita Si Meriah, si njamin kegeluhen ku kiniulin si tuhu-tuhu. Berita si meriah e tuhu-tuhu penting kel, emakana Paulus ras teman-temanna tetap alu semangat mberitaken kerna Berita si meriah e. Amin pe arus ia bersaing ras pengajaren si papak. Paulus nuriken maka kalak si la ngasup ngidah dingen ngaloke Berita Si Meriha e, perlawesna eme kempak kebenen. Sebab pengajaren si papak e pe tetap kang erjuang guna mapakken kerina jelma.
Tapi Terang e eme Berita Si Meriah, si encidahken kemulian Kristus ras Dibata. Janah selaku anak-anak Terang ni Kristus, Paulus ras teman sepelayanenna terus erjuang guna mberitaken Terang e. Dibata kap Terange, dingen Ia ka ka psi empengasup kita guna jadi terangNa. Si mabai kegeluhenta guna nerangi doni si dem alu kegelapen.
- Aplikasi
Gereja si ideal tentuna labo terjeng gedung si metunggung dingen mehaga man tatapen. Tapi perpulungen si tetap nggeluh ibas kiniteken. Gedung gereja si megah banci saja runtuh erkiteken situasi, dingen luntur catna erkiteken tambah tahunna. Tapi perpulungen si paguh kinitekenna tentu ngasup empertahanken persadanna ras Dibata amin pe melala tantangen kegeluhen si ngancam kegeluhenna. Mari selaku perpulungen si enggo idilo Dibata guna jadi terangNa, jadilah gereja-gereja si nggeluh, si maba terang Kristus i japa pe kita ringan.
“Ersinalsal Teranglah, sebab Kristus enggo ndilo kita guna jadi TerangNa”
