KHOTBAH MINGGU 27 FEBRUARI 2022
Pdt. Sabar Brahmana, M.A
1. Tema “Kata Dibata Mereken Keriahen”:
a. Tema enda ngingetken maka Kata Dibata e arusna mereken keriahen man kalak singalokenca, labo sebalikna. Desken pangan si ergiji maba kesehaten, gegeh ras tentuna pe maba keriahen. Enda jelas man kalak si lit panganna tentu meriah kal akapna terlebih ibas paksa sulit, sebalikna kalak si la cukup, apai ka la lit panganna tentu erbahansa ndele ate.
b. Engkai maka Kata Dibata mereken keriahen? Kerna Kata Dibata e erkuasa sabab Kata e Yesus Kristus (Bd. Yohanes 1:1, 14), Kata e pe terang man banta (Mazmur 119:105), rsd
2. Jesaya 55:10-13 eme bagin kitab Yesaya si peduaken eme ija bangsa Yehuda enterem ibuang ku Babel. Tnetu situasi enda sitek pe la menyenangken. Janah sebab maka ibuang ku Babel pe situhuna erkiteken bangsa enda lanai patuh man Dibata, la nai mengendalken Dibata ibas geluhna, la nai ngikutken kata Dibata. Khusus ibas bagin pasal 55 enda iban LAI judulna Nggit min Israel Ngalokenca. Ngaloken kai? Ngaloken pemere Dibata/perkuah ate Dibata, ngaloken penampat Dibata alu megiken ras ngikutken Kata Dibata. Janah ibas bagin khotba ayat 10-13 ngingetken uga konsistenna Dibata ibas kai si ijanjikenna/kai si ipadankenna. Arah bagin enda pe ngingetken maka keleng ate Dibata la kap erkeri-keri man bangsana amin gia I hukum tapi tetap nge ingitNa ras berekenna dalan pulah eme alu nggit jera, alu mulihken nggit ras ngelakoken KataNa. Isingetken:
a. Kata Dibata e la sia-sia tepi tuhu-tuhu erguna man si ngelakokenca (bd. Ayat 10-11)
b. Kata Dibata e mereken Keriahen (bd. Ayat 12). Payo kadang secara logika banci saja la siakap mungkin lit dalan pulah ibas masalahta, bagi bangsa Yuda secara kai pe la mungkin banci mulihken ku Yerusalem sabab labo lit gegehna baik secara politik bagipe angkaten bersenjata, tapi si la mungkin akap manusia ibas Dibata mungkin eme si isingetken ibas ayat enda, janah payo adi sinin ibas bagin si peteluken Kitab Yesaya enda uga cara Dibata erbahansa kalak Yehuda/Israel mulihken ku kutana Israel.
c. Kata Dibata maba perubahen (Bd. Ayat 13). Enda pe nuduhken maka Dibata arah KataNa erkuasa mengubahken si gelgel ije turah duri jadi turah kayu eru, bagepe si gelgel ije turah rambah duri turah kayu murbai. Enda ngataken maka kalak si megiken ras ngikutken Kata Dibata akan terjadi perubahen si signifikan ku si mehuli, ku sierguna.
3. Matius 13:18-23 eme perumpaman singambur benih. Arah perumpaman enda jelas maka kalak si megiken kata Dibata alu mehuli ras si ndalankenca ia desken benih si ndabuh ku taneh si mehumur. Uga jadina? Pastilah benih e turah mehuli, reh galangna, megegeh ia ibas ngalaken angin si nderpasa janah ibas paksana erbuah. Kata she erbuah enda penting sebab arapen Dibata nandangi kita eme gelah kita erbuah, jadi pasu-pasu man kalak sideban.
4. Pointer Aplikasi
a. Selaku ajar-ajar Tuhan, selaku anak-anak Tuhan, selaku kalak Kristen tentu perlu kal nakan pertendin eme kata Dibata. Sehat, megegeh kita ntah lang tergantung pangan sipan. Emaka perlu kal tetap megiken, merenungken ras makeken kata Dibata e ibas geluhta.
b. Terlebih ibas kegeluhenta selaku kalak Kristen/selaku anak-anak Dibata ternyata labo sepi perbeben, labo sepi kiniseran sinihadapi kita. Simberatna kiniseran e labo rehna I darat nari tapi banci pe arah pasangenta, temanta saya pelayanen. Adi pendeta kin ibas pertua/Diaken nari, rsd. Tapi si enda memang arus sibentasi. Enda pe si isinget ibas invocatiota, Perb. Rasul 14:22. Janah Yesus pe enggo mpesingeti kerina kalak siatena ngikutken Yesus ibas Matius 16:24; Matius 10:38, rst.
c. Selaku anak-anak Tuhan berarti kita desken taneh si mehumur ingan turah kata Dibata e, emaka mari sicidahken e ibas geluhta arah kegeluhen si megenggeng ibas ngalaken perbeben, ibas keriahen ukur ras kemalemen ateta ndalani kegeluhen baik bagi ukur ntah lang, ibas jadi pasu-pasu man kalak Sideban.
d. Janji Tuhan ya rasa min, sabab Dibata sangat konsisten ibas janjina. Emaka tetap kita tek man Dibata arah kataNa si isehkenNa man banta.
